octubre 21, 2014

El tiempu camudante


Dicen que los tiempos camudan y nun solu los días.
Dicen que camudan las estaciones, la calor, el fríu, 
la chuvia y la ñeve, camudan las xeladas.

Tantas palabras pa espresar el tiempu,
calor, xelada, cutu, galbana, gilsu, rebilba,
relentu, friura, canícula,
solana, farona, agostu...

Dicen que yá nun hai'l mesmu tiempu
que nun cayen xeladas de las d'antias
que la calor nun yía igual
que nun hai ñeve
y que nun chueve más.

Las barcas de los ríos nun son necesarias
decenas de represas afogan los valles
pantanos cumu mares decoran las montañas.
Ñacen felechos onde namás había rocas.

Lu que nun camudan son los mitos.
Los llïoneses somos de tierras frías,
de ñeves grandes,
de xeladas ablucantes,
de fríos hibiernos.
Nun importa si asocede ou non más,
la guelga de la memoria empapa lu cotidianu.

Los idiomas espeyan la rialidá de los falantes,
el llïonés cumu'l que más.
Malapenas palabras pa la calor,
cientos d'eillas pal fríu.

¿Yes de Llión? uf, qué fríu.





octubre 06, 2014

Toos queremos ser llibres.
Toos queremos ser y dicir lu que nos pete.
Clamamos pula llibertá d'espresanos
d'amosanos al mundiu cumu lu que sintimos y camentamos
un xeitu individual que relluma na multitú universal infinita
un xeitu únicu, irrepetible, incopiable,
imposible de que vuelva asoceder nunca más.


¿Esiste la llibertá? ¿esiste dalgién prenamente llibre?
¿quién yía completamente llibre pa facer 
y espresase ensin los demás?
dicen que la nuesa llibertá escomencipia u finan la d'outros.
Fras que tampoucu va cierta.

Naide pon más llinde a la tua llibertá que los demás,
nada esiste más curtiante de la llibertá que los criterios d'outros,
nunca yes llibre pur completu,
dependes de los demás,
del sou xuiciu,
del sou criteriu,
de que t'almitan cumu yías.
La total llibertá nun esiste.


La total llibertá esiste nu interior de cada ser.
La verdadeira llibertá esiste na nuesa tiesta,
llibertá de cabilamientu,
llibertá de planificación,
llibertá de sueños
llibertá de deseyos.

Y tamién...
llibre de tabús
llibre de prexuicios
llibre d'interferencias d'outros
llibre pa tomar decisiones.

Si tua mente yía llibre,
y el tou corazón tamién,
podrás facer lu que deseyes.

Ehí ta la verdadeira llibertá.
¿Esiste outra verdadeira llibertá?